يسموها مايسموهاش
يطولوها وماننولهاش
ماتبقاش كلمة وحلم
وبعد دا كله مانطولهاش
ولا هي الحريه لناس ناس
والناس اللي شبهنا ملهاش
البحر لوهاج مابيهداش
والريح في الزوابع مخلاش
وأنت بتعشق بنت خيالك ف الأحلام
ماشي .. أحلم
وادخل جوا الحلم مرة
لو طعم العيشة مُـرة
واطلع من أوضة النوم
لو مافيهاش حريه وقوم
من حبسة زهقك البدروم
أسكن في السطح العالي
الحريــة بتضيّق ع الناس
وسكان الأرضي بتتألم
وأقله هاتعرف تتكلم
تتمتع بطلوع السلم
وإن عرقك هايحر هدومك
أهي فرصه تتسلي في يومك
تهرب من كتمة بدرومك
هاتنهج وتريح ...
وهاترجع وتواصل
وإن نئحت عليك المفاصل
دلكها بأيدك وواصل
وبلاش تعوصها بتراب الترابزين
والشعبطه ع الجاهزين
صنف بــاتــا بأبزيم
لحد مايمسحهم الناس اللي تحت
وأنت لو أرتحت فوق السطوح
وعرفت تاخد نفسك المبحوح
بكل حريه
ماتغرقش في الحلم
وتتـوه
وتنسي في طلعتـك للسطوح
الناس اللي غرقت في الجروح
ولا طالت سما.. ولا شافت سطوح
وأنا اللي اندبحت أكثر ما أنا مدبوح
لساني بواقي جناح بيفتش ع البناني
وحرية للخلق بكل المعاني
تبدل هروبنا من كاني وماني
حكم هروبنا ف النوم إعدام
والبحر لو نامت له نوه ,
تفردنا الريح قلوع وئام
وساعة مانحس في بعض بالسلام
حاتــلاقى
البنت اللى اتمنيتها
حقيقة وجيالك أدامك
حوريه بتشد للحرية
زى المـلاك
موضوع: بنت الناس اللي تحت 
الأربعاء فبراير 04, 2009 6:38 pm
